ത്രെഡ്...!!
"സാഹിത്യലോകത്ത്‌ പേരോ വേരോയില്ലാത്ത നിങ്ങളെഴുതിയ ഒരു കഥ രൂപം മാറി മറ്റൊരിടത്ത് അച്ചടിച്ച് വരുന്നതിന് പിന്നിൽ,
സൂത്രക്കാരനായ ഒരു എഡിറ്ററും ക്രൂരനായ ഒരു കഥാകൃത്തും തമ്മിലുള്ള സൗഹൃദത്തിന്റെ കഥയുണ്ട്.."
(ഒരു ആരോപണം. മെയ് 21/2019 ന് കൊലചെയ്യപ്പെട്ട കഥാകൃത്ത്)
നിങ്ങൾക്ക് പരേത്മാവിൽ വിശ്വാസമുണ്ടോ എന്നെനിക്കറിയില്ല. എന്തായാലും ഞാനിപ്പോൾ അതിൽ അടിയുറച്ച് വിശ്വസിക്കുന്നു. "ഒരു തെറ്റ്' എന്നപേരിൽ എഴുതിയ കുറിപ്പ് ഇപ്പോൾ 'ത്രെഡ്' എന്ന് മാറ്റിയെഴുതാൻ സംഗതി വന്നല്ലോ..?
ഇതിന്റെ പിന്നിൽ കൊലചെയ്യപ്പെട്ട കഥാകൃത്തിന്റെ ആത്മാവ് തന്നെ.
കാര്യങ്ങൾ വെളിപ്പെടുത്തുന്നതിന് മുൻപ്
ഇത് വായിക്കുന്ന നിങ്ങളോട് ചില പ്രധാനപ്പെട്ട കാര്യങ്ങൾ സൂചിപ്പിക്കുന്നത് നന്നായിരിക്കുമെന്നെനിക്ക് തോന്നുന്നു..
1.മെയ് 21 ന് ഞാൻ ഒരു കഥാകൃത്തിനെ കൊന്നു.
2.ഞാനുൾപ്പെടെ നാലു പേർക്ക് പരമാവധി ശിക്ഷ കിട്ടുന്ന വിധം ഒരു കേസ് നടത്താൻ നിങ്ങൾ തയാറാകണം.
3.അധോലോകം ഉൾപ്പെടെ എല്ലാ പത്രാധിപർക്കും ഞാൻ ഈ കുറിപ്പ് അയച്ചിട്ടുണ്ട്
അവർ ചിലപ്പോൾ ഒരു കഥയായി അച്ചടിക്കാൻ സാധ്യതയുണ്ട്..
സൂചനകൾ ഇനിയുമുണ്ട്
ഒരു പക്ഷെ ബോറൻ ആഖ്യാനമുള്ള ഒരു കഥയുടെ ആദ്യഭാഗത്തു നിന്നെന്നപോലെ നിങ്ങൾ ഇറങ്ങിപ്പോയാൽ ആ കഥാകൃത്തിന്റെ അന്ത്യത്തിന് കാരണക്കാരായവർ രക്ഷപ്പെടും.
നോക്കു വെറുമൊരു ഗുണ്ടയായ എനിക്ക് എഴുത്തിൽ ഇത്രയൊക്കെ സൂക്ഷ്മത പുലർത്താൻ സാധിക്കുന്നുല്ലോ..?
ഇതൊക്കെകൊണ്ടാണ് ഗതികിട്ടാത്ത കഥാകൃത്തിന്റെ ആത്മാവ് എന്നെക്കൊണ്ട് എഴുതിക്കുന്നതാണെന്ന് ഞാൻ ഉറച്ച് വിശ്വസിക്കുന്നത്..
അധോലോകത്തിന്റെ ഗോഡൗണിൽ വച്ച് ആ കഥാകൃത്തിന്റെ വയറ്റിൽ ഞാൻ കത്തിയിറക്കുമ്പോൾ ഒരു തുള്ളികണ്ണീരോ നിലവിളിയോ ഉണ്ടായിട്ടില്ല. എന്റെ മുഖത്ത് അയാളുടെ കണ്ണുകൾ ഉറച്ചു നിന്നു..
" നിങ്ങളുടെ അതേ പേരിൽ നീതിമാനായ ഒരു കഥാകൃത്ത് ജീവിച്ചിരുന്നു." അയാളുടെ ഒടുവിലെ വാക്കുകളിൽ ഞാനാകെ തകർന്നുപോയി. ആദ്യാമായിട്ടാവും മരണപ്പെട്ടവന്റെ മുന്നിൽ കൊല്ലുന്നവൻ തോറ്റു പോകുന്നത്..
രണ്ട് ദിവസം കഴിഞ്ഞിട്ടാണ് എനിക്ക് ആ ശരീരം ദഹിപ്പിക്കാൻ കഴിഞ്ഞത്. ഷെർലക്ക് ബുദ്ധിയുള്ള നൂറ് പൊലീസുകാർ വന്നാലും ഒരു തെളിവും കിട്ടാതെ കാര്യങ്ങൾ നിസാരമായി കൈകാര്യം ചെയ്തിട്ടുള്ള എനിക്കാണ് ഇത്തരമൊരനുഭവമെന്നോർക്കണം..
നിങ്ങളുടെ മുന്നിൽ എനിക്കിങ്ങനെ മറഞ്ഞു നിൽക്കാൻ കഴിയുമെന്ന് തോന്നുന്നില്ല.
അക്ഷര നഗരിയിലെ തിരക്കുള്ള ഗുണ്ടാ നേതാവാണ് ഞാൻ. സാംസ്കാരിക ക്വട്ടേഷനുകൾ ചെയ്യാൻ പ്രത്യേക വാസനയുള്ള എന്നെ വക്കീൽ വിളിപ്പിച്ചു. എഴുത്തുകാർ, ചിത്രകാരന്മാർ, ശില്പികൾ ഇവരെ കൈകാര്യം ചെയ്യാൻ എനിക്കെന്തോ പ്രത്യേക കൗതുകമുണ്ട്..
നിങ്ങൾക്ക് എന്നെ കൂടുതൽ മനസിലാകാൻ ചില കാര്യങ്ങൾ കൂടെ ഓർമ്മിപ്പിക്കാം..
അടുത്തിടെ ഒരു പരിസ്ഥിതി വാദിയായ ചിത്രകാരനെ കൈകാര്യം ചെയ്ത കേസിൽ ഞാൻ പ്രതിയായിരുന്നു. വയൽ നികത്തി റിസോർട്ട് പണിത ഒരു രാഷ്ട്രീയകാരനു വേണ്ടി ആ ക്വട്ടേഷൻ എന്നെ ഏല്പിച്ചത് ഇതേ വക്കീലുതന്നെ. സമരം ചെയ്ത മറ്റു പ്രകൃതിസ്നേഹികൾ ഒന്നര ലക്ഷം വീതം വാങ്ങി സമാധാനത്തോടെ പിരിഞ്ഞ് പോയിട്ടും ഇയാൾക്ക് കുലുക്കമില്ല.
അഞ്ച് ലക്ഷത്തിൽ കുറഞ്ഞ് ഒരു വിട്ടു വീഴ്ച്ചയ്ക്കും തയാറല്ലത്രേ.
എന്റെ ഇടപെടലിൽ ഒറ്റ ലക്ഷത്തിന് വഴങ്ങി.
രൂപ അമ്പതിനായിരം എന്റെ പോക്കറ്റിൽ. സമരപന്തലിന്റെ പിന്നിലെ കണ്ടൽക്കാട്ടിൽക്കിടന്ന് പ്രകൃതിവാദി വാങ്ങിയ ഇടി വച്ചു നോക്കിയാൽ ആ ഒരു ലക്ഷം ഏതെങ്കിലും ആയുർവേദ കേന്ദ്രത്തിൽ എത്തും..
വേറൊന്നുകൂടെ പറയാം നിങ്ങൾക്കും എനിക്കും അതിത്തിരി കൗതുകമുള്ള സംഗതിയാണ്.
അടുത്തിടെ വിവാദമായ പുസ്തകം
ഓർക്കുന്നുണ്ടോ..? ദൈവങ്ങളെയൊക്കെ തെറി പറഞ്ഞ ഒരു ഐറ്റം.
ആ എഴുത്തുകാരനെ അജ്ഞാത മതതീവ്രവാദികൾ കൈയേറ്റം ചെയ്തുവെന്ന വാർത്ത വന്നിരുന്നു ശ്രദ്ധിച്ചിട്ടുണ്ടോ..? വാസ്തവത്തിൽ ആ അജ്ഞാത മത തീവ്രവാദി ഞാനാണ്. ഒറ്റ മാസം കൊണ്ട് ഇരുപത് പതിപ്പ് വിറ്റുപോയ ആ പുസ്തകം ഈ നാട്ടിലെ ശരാശരി വായനക്കാരനു പോലും ഓർമ്മാവരാതിരിക്കില്ല..ഈ കുറിപ്പിന്റെ ഇത്രയും ഭാഗം വരെ എത്തിയിട്ടുണ്ടെങ്കിൽ നിങ്ങൾ പോലും ആ പുസ്തകം വായിച്ചിട്ടുണ്ട് തീർച്ച.
ഇനി ഇതിലെ കൗതുകം പറയട്ടെ തന്നെ തല്ലാൻ വക്കീലുവഴി എന്നെ ഏർപ്പാടാക്കിയത് ആ എഴുത്തുകാരൻ തന്നെയായിരുന്നു.
തെരുവിൽ കിടന്ന് നാലഞ്ച് അടിവാങ്ങിയെങ്കിലെന്ത് അക്കാദമി അവാർഡിന് വരെ ആ പുസ്തകം പരിഗണിക്കപ്പെട്ടില്ലേ...?
എത്ര ചർച്ചകൾ പ്രതിഷേധ സദസുകൾ നിങ്ങളും ഏതെങ്കിലും സദസിൽ പോയിട്ടുണ്ടാകുമല്ലേ...?
അറബി വാക്കുകൾ പഠിച്ചു, തല്ലിനിടയിൽ ആളുകൾ കേൾക്കെ വിളിച്ചുപറഞ്ഞു, നീളൻ കുപ്പായവും തൊപ്പിയുമൊക്കെയായി സ്റ്റണ്ട് അഭിനയിച്ചു. എനിക്കും അത് പുതിയ അനുഭവമായിരുന്നു. ഞങ്ങൾ ക്വട്ടേഷൻ പണിക്കാരുടെ പ്ലാനുകൾ ആ എഴുത്തുകാരന്റെ മാസ്റ്റർപ്ലാനിന്റെ മുന്നിൽ വെറും നിസാരം..
ഏല്പിച്ച പണികളെല്ലാം കൃത്യമായി ചെയ്തതു കൊണ്ടാണ് ഈ കേസിനും വക്കീൽലെന്നെ വിളിപ്പിച്ചത്. അവരുടെ ഫ്‌ളാറ്റിലെത്തുമ്പോൾ അധോലോകം പത്രാധിപരും അയാളുടെ സുഹൃത്തും, വക്കീലും, കഥാകൃത്തും ഏതോ വിഷയത്തിൽ കാര്യമായ തർക്കം നടക്കുന്നുണ്ടായിരുന്നു. വക്കീൽ എന്നോട് ഇരിക്കാൻ ആംഗ്യം കാണിച്ചു. പത്രാധിപർ എന്നെ വന്ന് പരിചയപ്പെട്ടു. സുഹൃത്ത് എനിക്ക് നീല നിറത്തിലുള്ള വിസ്കി ഒഴിച്ചു..
പക്ഷേ അവരുടെ ശ്രദ്ധമുഴുവൻ വക്കീലിന്റെ അനുനയിപ്പിക്കൽ ശ്രമത്തിലായിരുന്നു.
അഞ്ചുമിനിറ്റ് ആയിക്കാണും വക്കീൽ ഞങ്ങളിരിക്കുന്ന ഭാഗത്തേക്ക് വന്നു.
അവർ മൂന്നാളും കുറച്ച് മാറി നിന്ന് എന്തൊക്കെയോ പറയുന്നു. വീണ്ടും വിസ്കിയിലേക്ക് വീഴുന്ന എന്റെ നോട്ടം കണ്ടിട്ട് പത്രാധിപർ, എടുക്കുക കുടിക്കുക സന്തോഷിക്കുക എന്നൊക്കെ ആർഥ്മുള്ള ഒരു ചിരിയയച്ചു...
ഞാൻ കഥാകൃത്തിനെ നോക്കി അയാൾ ആകെ അസ്വസ്ഥനാണ്.മടിയിലെ തുണി സഞ്ചിയിൽ അമർത്തിപ്പിടിച്ചിരിക്കുന്നു.പോക്കറ്റിൽ നിന്ന് ഒരു ബീഡിയെടുത്ത് വലിക്കുന്നു...
"മറ്റു വഴിയില്ല ഭായ് ഇവരൊക്കെ പത്തിരുപത് വർഷം കൊണ്ടുണ്ടാക്കിയ ഇമേജിനാണ് ആ ചെറ്റ വില പറയുന്നത്." വക്കീലെനിക്ക് അത്യാവശ്യം നല്ലൊരു തുക ഉറപ്പിച്ചു ,ഒരാഴ്ച്ചത്തെ സമയവും.
ഫ്‌ളാറ്റിൽ നിന്ന് ഞാനും കഥാകൃത്തും ഒന്നിച്ചാണ് ഇറങ്ങിയത്. ഹസ്തദാന സമയത്ത് എന്റെ പേര്‌ ചോദിച്ചു.എന്റെ പേരുകേട്ട് അയാൾ ചിരിച്ചു, ഞാനും..നല്ല നിലാവ് പോലുള്ള ചിരി..
സാധാരണ ഏറ്റെടുക്കുന്ന കേസുകളുടെ ഭൂതവും ഭാവിയും തിരഞ്ഞ് പോകാത്തതാണ്. എങ്കിലും ഫൈനൽ തുക സെറ്റിൽ ചെയ്യുന്ന ദിവസം വക്കീലിന്റെ വീട്ടിൽ വച്ച് കഥാകൃത്തിനെക്കുറിച്ച് എനിക്ക് ചോദിക്കേണ്ടി വന്നു.വക്കീലെന്നെ സംശയരൂപത്തിൽ നോക്കി. പിന്നീട് അയാളുടെ കണ്ണുകൾ നനഞ്ഞു. ആയാളും ആകെ അസ്വസ്ഥനായിരുന്നു. മേശയിൽ നീലനിറമുള്ള അതേ വിസ്കിയുടെ പകുതിയായ കുപ്പി.
അതിൽ നിന്ന് പകർന്നതുമായി വക്കീൽ ജാലകത്തിലൂടെ പുറത്തേക്ക് നോക്കി നിന്നു. അരമണിക്കൂർ കഴിഞ്ഞിട്ടും ഒന്നും മിണ്ടുന്നില്ല.
ഒന്നുരണ്ട് തവണ ഞാനും ഗ്ളാസ് നിറച്ചു.
ഞാനെഴുന്നേൽക്കാൻ തുടങ്ങിയപ്പോൾ തിരിഞ്ഞു നോക്കാതെ എന്നോട് ഇരിക്കാൻ ആംഗ്യം കാണിച്ചു. അതേ നിൽപാണ് എന്നെപ്പോലെ വക്കീലിനും കാര്യമായിട്ടെന്തോ സംഭവിച്ചിട്ടുണ്ട് തീർച്ച. പതിവില്ലാതെ വക്കീലിന്റെ വീട്ടിൽ ആളനക്കമില്ലാതായിരിക്കുന്നു..
അതേക്കുറിച്ച് എന്തെങ്കിലും ചോദിക്കാൻ വേണ്ടി ഞാൻ മനസിൽ വാക്യങ്ങൾ ഒരുക്കിയെടുത്തു. ചോദ്യത്തിന്റെ ഔചിത്യം ഉറപ്പിക്കാൻ അകത്തേക്ക് ഞാനായച്ച നോട്ടം വക്കീലിന്റെ കണ്ണിൽപ്പെട്ടു..
"എന്റെ മോൾക്ക് ഇത്തിരി സാഹിത്യ താല്പര്യമുണ്ട് ഇടുക്കിയിൽ ഒരു ക്യാമ്പിന് പോയതാ,അവളും കൂട്ടുപോയി" എന്റെ ഉള്ളിൽ കഥാകൃത്തിന്റെ ഒടുവിലെ ചിരി തെളിഞ്ഞു. മേശപ്പുറത്ത് വായിച്ച് കമഴ്ത്തി വച്ചിരിക്കുന്ന കഥാകൃത്തിന്റെ പുസ്തകം 'പണയം വച്ച വീടുകൾ'. ഞങ്ങളുടെ ഓപറേഷനുകളിലെ ഒരു രീതിയാണത്. പണികൊടുക്കുന്ന ആളുകളുടെ എന്തെങ്കിലും ചിലത് തെളിവായി സൂക്ഷിക്കും.സംഗതി നടന്നുവെന്നതിന് തെളിവായിട്ടാണ് ഞാനെടുക്കുന്നതെങ്കിലും വക്കീലിന്റെ താൽപര്യം പണി ഏല്പിച്ചവർക്ക് പിന്നൊരിക്കൽ അതുവച്ച് പണികൊടുക്കാൻ തോന്നിയാലോ എന്നാകും..
പണികൊടുക്കാൻ പൊക്കിയ ദിവസം കഥാകൃത്തിന്റെ തുണി സഞ്ചിയിൽ കോഴിക്കോട്ടെ ഏതോ പ്രസാധകൻ അച്ചടിച്ച 'പണിതീരാത്ത വീടിന്റെ' നാലു കോപ്പി, മുന്നൂറ്റി അറുപത് രൂപ,വക്ക് പൊട്ടിയ ഫോണ്, ഏതോ ശില്പശായിൽ പങ്കെടുത്ത് കിട്ടിയ ഒരു കുറിപ്പ് പുസ്തകം ഇതൊക്കെയേ ഉണ്ടായിരുന്നുള്ളു..
പണിതീരത്ത വീടിന്റെ ഒരു കഥ ഞാൻ വായിക്കാൻ ശ്രമിച്ചു. കഴിഞ്ഞില്ല.വക്കീൽ കമഴ്ത്തി വച്ചിരിക്കുന്ന പുസ്തകം നോക്കിയിട്ട് ഇനി അതിന്റെ ഏതാനും പേജുകളെ ബാക്കിയുള്ളൂ..
കഥയൊന്നും എനിക്കത്ര മനസിലായില്ല.
കുറിപ്പ് പുസ്തകത്തിൽ ഒടുവിൽ എഴുതിയത് നിങ്ങൾക്ക് വേണ്ടി എഴുതാം ഒരുപക്ഷേ ഈ കേസിന്റെ നടത്തിപ്പിന് സഹായമായാലോ..?
"അപഹരിക്കപ്പെട്ട കഥകൾക്ക് ഒരു കോടതിയിലും നീതി ലഭിക്കില്ല."
"എഴുത്തുകാരനല്ലാതെ മറ്റാർക്കും അത് മനസിലാക്കാനും കഴിയില്ല"
"ഈ കഥാലോകത്തെ ഒരിക്കലും വിശ്വസിക്കരുത്, അവരോളം സ്വാർത്ഥതയുള്ള ഒരു വിഭാഗമുണ്ടോ.?
"
"കഥ കൊണ്ടുവേണം ഇതിനോക്കെ മറുപടി കൊടുക്കാൻ"
"അപഹരിക്കപ്പെട്ട കുട്ടികൾ" അതിനൊക്കെ താഴെ ഇങ്ങനെയൊരു തലവാചകം എഴുതി വരയിട്ട് വച്ചിരുന്നു..
വക്കീലെന്റെ തോളിൽ കൈവച്ചപ്പോഴാണ്.
വിസ്കിയും പിടിച്ച് ജനാലയിലൂടെ ഞാനും പുറത്തേക്ക് നോക്കി നിൽക്കുന്നത് ബോധ്യം വന്നത്. വക്കീലിന്റെ മുഖത്ത് പതിവില്ലാതെ ഒരു ആർദ്രത..
"അധോലോകത്തിന്റെ വിശേഷാൽ പതിപ്പ് നീ കണ്ടിട്ടുണ്ടോ..? " കഥാകൃത്തിനെക്കുറിച്ചാണ് വക്കീൽ പറഞ്ഞ് തുടങ്ങിയതെന്ന് തിരിച്ചറിയാൻ കുറേ സമയം വേണ്ടിവന്നു. പിന്നെപ്പറഞ്ഞതും മസിലാക്കാൻ കഴിഞ്ഞില്ല..
"അധോലോകത്തിന്റെ പത്രാധിപനൊരു വേന്ദ്രനാ. അയാളുടെ വിശേഷാൽ പതിപ്പിൽ ഏതൊക്കെ കഥ ആരോക്കെ എഴുതണമെന്ന് വളരെ മുന്നേ തീരുമാനിക്കും. എഴുത്തിലെ വലിയ മൂന്ന് കൊമ്പന്മാർക്ക് ഒരു കഥ തരണമെന്നും പറഞ്ഞ് കത്തും കാശുമായി മുഖചിത്രം ഷൂട്ട് ചെയ്യാനുള്ള ഒരു ക്യാമറമാനെ അയയ്ക്കും. പിന്നെ ഏതെങ്കിലും വിവാദ താരത്തിന്റെ അഭിമുഖം.പ്രമുഖ നിരൂപകരുടെ ക്വാട്ടയിൽ ഒന്നോ രണ്ടോ കഥ.
അത് കഴിഞ്ഞ് പത്ത് കഥകൾക്കുമുള്ള ത്രെഡ് അയാൾ തന്നെ കൊടുക്കും അതിന് പറ്റിയ എഴുത്ത് വലയം അയാൾക്കുണ്ട്...
ഇതിലൊരു സംഗതിയുണ്ട് ഈ എഴുത്തുകാർക്ക് പോലും അറിയില്ല. അധോലോകത്തിൽ അച്ചടിക്കാൻ ലോകാത്തിന്റെ നാനാകോണുകളിൽ നിന്ന് പലർ അയച്ചുകൊടുത്ത കഥകളുടെ ജീനുകളാണ് വിതരണം ചെയ്യപ്പെട്ടതെന്ന്.. "
മനസിലാകാത്തത് പോട്ടെ, ഇതൊക്കെ എങ്ങനെ ഓർമ്മിച്ചെഴുതാൻ കഴിഞ്ഞെന്നുപോലും വിശദീകരിക്കാൻ കഴിയില്ല..എന്റെ ഇരുപ്പുകണ്ട് വക്കീൽ അല്പം ലൈറ്റാക്കി..
"നമ്മുടെ കഥാകൃത്ത് അധോലോകത്തിൽ അച്ചടിക്കാൻ അയച്ച ഒരു കഥയുടെ ഉള്ളിലെ ഐറ്റം എഡിറ്റർ ചങ്ങാതിയായ ഒരാൾക്ക് കൊടുത്തു. കക്ഷിയെ നീ അറിയും.
അന്ന് അവിടെയുണ്ടായിരുന്നു. നിനക്ക് വിസ്കി ഒഴിച്ച..ആയാളൊരു പ്രവാസിയാ, സ്വർണക്കച്ചവടവും എഴുത്തും എങ്ങനെ കൊണ്ടു പോകുന്നു എന്നൊന്നും അറിയില്ല. നാട്ടിൽ കാഞ്ഞിരപ്പള്ളിയാ സ്ഥലം.
വർഷത്തിൽ ഒന്നോ രണ്ടോ തവണ ഇന്ത്യയിൽ വന്നാലായി. ബിനാമിവഴി ഒരു ട്രസ്റ്റ് ഉണ്ടാക്കി അതിന്റെ തന്നെ സാഹിത്യ അവാർഡ് ഒപ്പിച്ച ആളാണ് കക്ഷി.. വിശേഷാൽ പതിപ്പിൽ തന്റെ കഥയുടെ പകർപ്പ് കണ്ടതും കഥാകൃത്തിന് ആകെ കലിപ്പായി...
ഇത് വായിക്കുന്നവർക്ക് അത്ര സംശയം തോന്നില്ല.
നമ്മുടെ കഥാകൃത്തിന്റെ കഥയിൽ ഇറച്ചി കഴിക്കുന്ന ഒരു ആട്, കല്യാണ പന്തലിന്റെ എച്ചിൽ കൂനയിൽ അത് സ്ഥിരമായി ആഹരിക്കുന്നു, നാട്ടിൽ ഒരു പത്തുവയസുകാരി കാണാതെയാകുന്നു. അവളുടെ ചുവന്ന പുള്ളിപ്പാവാട ആടിന്റെ സമീപം കിട്ടുന്നു.ഇറച്ചിയുടെ രുചി അറിഞ്ഞ ആട് മനുഷ്യമാംസം കഴിക്കുമെന്ന് കിംവദന്തി ഉണ്ടാകുന്നു.നാട്ടുകാർ തല്ലിക്കൊല്ലുന്നു..
പ്രവാസിയുടെ കഥയിൽ ഒരു പശു അതും കാഞ്ഞിരപ്പള്ളിയിലെ ഏതോ പ്രത്യേക ബ്രീഡ്..
ഹോട്ടലുകാരനായ ഉടമ കൊണ്ടുവരുന്ന എച്ചിലിൽ ഇറച്ചി കഴിക്കുന്നു. ഹോട്ടൽ കാരന്റെ മകനെ കാണാതാകുന്നു.. തൊഴുത്തിൽ നിന്ന് കുട്ടിയുടെ ഒരു ചെരിപ്പ് കിട്ടുന്നു.കിംവദന്തികൾ പ്രചരിക്കുന്നു.. ബീഫ് ബീരാന് പശുവിനെ വിൽക്കുന്നു...
ഫേസ്ബുക്കിലും വാട്‌സ് ആപ്പിലും ഇതിനെക്കുറിച്ച് ശരിക്ക് എഴുതി. അധോലോകത്തിന്റെ എതിർ ടീം ചെറിയ പിന്തുണയൊക്കെ കൊടുത്തു..
ഇത് ചർച്ചയാകും നാറ്റക്കേസാകും എന്നൊക്കെ തോന്നിത്തുടങ്ങിയപ്പോൾ നുമ്മടെ പ്രവാസിയും രംഗത്ത് വന്നു. ഇതിനിടയിൽ കഥാകൃത്ത് ഒരു ഏതോ ഒരു വക്കീലിനെക്കൊണ്ട് എഡിറ്റർക്കും പ്രവാസിക്കും എതിരെ നോട്ടിസ് അയപ്പിച്ചു..
കളി കൈവിട്ട് പോകുമെന്നായപ്പോഴാണ് നമ്മളെ വന്ന് കണ്ടത്.." വക്കീലിന്റെ നെറ്റിയിൽ വിയർപ്പ് പൊടിഞ്ഞു. കസേരയിൽ ഒന്ന് ചാരി മുകളിലേക്ക് നോക്കിയിരുന്നു. വീണ്ടും മൗനത്തിലേക്ക് പോകുമോയെന്ന് ഞാൻ ചിന്തിച്ചു..
"കേസ് ഒത്തു തീർക്കാൻ പ്രവാസി കുറച്ച് കാശൊക്കെ ഓഫർ ചെയ്തിരുന്നു. പക്ഷെ
കഥാകൃത്തിന്റെ ഡിമാന്റ് കലക്കനായിരുന്നു..
'വർഷത്തിൽ തന്റെ മൂന്ന് കഥയെങ്കിലും പതിനായിരകണക്കിന് കോപ്പികൾ വിറ്റുപോകുന്ന അധോലോകത്തിൽ അച്ചടിക്കണം, അധോലോകത്തിന്റെ പ്രസാധക സംരഭം വഴി ഉടൻ ഒരു കഥാസമാഹാരം ഇറക്കാനും സഹായിക്കണം.'
അവന്മാർക്ക് അതങ്ങ് സമ്മതിച്ചാൽ മതിയായിരുന്നല്ലോ..? ഇതിപ്പോ നമ്മളെയും പെടുത്തി..."
വക്കീൽ പെട്ടെന്ന് ടോയിലേറ്റിലേക്ക് പോയി. കരഞ്ഞ് കലങ്ങിയ കണ്ണുകളുമായാണ് തിരികെ വന്നത്. വക്കീലിന്റെ മൗനം എന്നെ വല്ലാതെ ഭയപ്പെടുത്തി.എന്റെ പ്രശ്നങ്ങൾ തുറന്നങ്ങ് പറഞ്ഞാലോ എന്നാലോചിച്ചു. പക്ഷെ മുഖത്ത് പോലും നോക്കാതെ വക്കീലിന്റെ അടുത്ത ചോദ്യം ഒരു ഗുണ്ടയോട് ലോകത്തിൽ ഇതുവരെ ഒരാളും ചോദിക്കാത്തത്...
"കഥ വായിക്കാറുണ്ടോ..?"
വക്കീലിന്റെ കണ്ണ് നിറഞ്ഞു. വിശേഷാൽ പതിപ്പും കഥയും അതിന്റെ കാര്യങ്ങളും പറഞ്ഞതു തന്നെ എനിക്ക് ദഹിക്കുന്നില്ല പിന്നെയാണ് വായന.
"അയാളുടെ വിശപ്പിന്റെ വിശുദ്ധപുസ്തകം എന്നൊരു കഥയുണ്ട് അതു വായിച്ച് ഞാനും മകളും കെട്ടിപ്പിടിച്ചിരുന്ന് കരഞ്ഞുപോയി,
മൂന്ന് ദിവസം അവളോ ഞങ്ങളോ ഒന്നും കഴിച്ചില്ല. ക്യാമ്പിലേക്ക് പോകാനിറങ്ങിയപ്പോൾ അവൾ പറഞ്ഞ വാക്കുകൾ....." വക്കീലിന് വാക്കുകൾ തടയാൻ തുടങ്ങി. ഉറക്കെ കരഞ്ഞു. എനിക്കവിടെ നിൽക്കാൻ തോന്നിയില്ല. ഞാൻ പുറത്തേക്കിറങ്ങിയപ്പോൾ കഥാകൃത്തിന്റെ സഞ്ചി വക്കീൽ എന്നെ ഏല്പിച്ചു...
"ഇതും എവിടെയെങ്കിലും കൊണ്ട് നശിപ്പിക്കണം."
വാതിലിൽ വച്ചു തന്നെ സഞ്ചി തുറന്ന് നോക്കി, അതിൽ കുറേ നോട്ടു കെട്ടുകൾ.
ഞാൻ വക്കീലിനെ നോക്കി..
"അത്, ആ കഥാകൃത്തിന്റെ രക്തത്തിന്റെ വിലയാണ് നിനക്ക് വേണമെങ്കിൽ എടുക്കാം അല്ലെങ്കിൽ അതും ചേർത്ത് നശിപ്പിച്ചുകളയൂ..."
മിണ്ടാതെ ഞാൻ പുറത്തിറങ്ങി.വക്കീൽ വാതിലോളം വന്നു. ഞാൻ തിരിഞ്ഞ് ചോദിച്ചു...
"എന്റെ അതേ പേരിൽ ഏതെങ്കിലും കഥാകൃത്തുക്കളുണ്ടായിരുന്നതായി വക്കീലിന് അറിയോ....?" അതിനും വലിയ കരച്ചിലായിരുന്നു മറുപടി.. പ്രിയപ്പെട്ടവരെ ഒന്നും നശിപ്പിക്കാൻ എനിക്ക് കഴിഞ്ഞിട്ടില്ല. വക്കീൽ നാടുവിട്ടുപോയി,
രണ്ടു ദിവസം കഴിഞ്ഞ് എന്റെ വിലാസത്തിൽ ഒരു കത്ത് വന്നു. അതിന്റെ വിശദീകരണമൊന്നും എനിക്ക് തരാൻ കഴിയുന്നില്ല.അതിലെ വരികൾ അതുപോലെ കുറിക്കാം...
കഥാകൃത്തുകൾക്ക് ചില നിർദ്ദേശങ്ങൾ..
1. കഥ അച്ചടിക്ക് അയയ്ക്കുമ്പോൾ ഒരു തെളിവ് സൂക്ഷിക്കുക.
(മെയിൽ വിലാസം വഴി അയയ്ക്കുന്നത് അഭികാമ്യം)
2. കഥ അച്ചടിച്ച് വരുന്ന പതിപ്പിന്റെ പ്രതിഫലം കൈപറ്റിയ രസീതി, ബാങ്ക് വിവരങ്ങൾ എന്നിവയോടൊപ്പം ആ പതിപ്പിന്റെ രണ്ട് കോപ്പിയും, മുൻപും പിൻപും വരുന്ന രണ്ട് ലക്കങ്ങളും സൂക്ഷിക്കുക.
3. അതേ പതിപ്പിലെ മറ്റു സൃഷ്ടികളുടെ കർത്താക്കളുമായി സൗഹൃദം സ്ഥാപിക്കുക.
4. നവ മാധ്യമങ്ങളിലും മറ്റും പ്രസിദ്ധിപ്പെടുത്തി, പരമാവധി വായനക്കാരുടെ ശ്രദ്ധ ഉറപ്പിക്കുക.
വക്കീലിന്റെ തിരോധാനം ഒരുമാസത്തോളം വാർത്തയായി.സഞ്ചിയിലെ തുകയുമായി പുസ്തകത്തിലെ വിലാസം നോക്കി
പ്രായശ്ചിത്തമെന്നതു പോലെ കഥാകൃത്തിന്റെ വീട്ടിൽ ഞാൻ പോയിരുന്നു.
കമ്യുണിസ്റ്റ് പച്ച കയറിയ ഒരു വീടിന്റെ അടിസ്ഥാനമല്ലാതെ മറ്റൊന്നും അവിടെയില്ല.
പതിനാലുകാരനായ ബുദ്ധിക്കുറവുള്ള മകനെ ഒരു ദിവസം കാണാതാകുകയായിരുന്നു വത്രേ..
പിന്നീട് എന്റെ ദിവസങ്ങൾ അതി ഭീകരമായിരുന്നു.. ഉറങ്ങാനായി കണ്ണടച്ചാൽ ഒരു പേന പാഞ്ഞ് വരുന്നത് പോലെ തോന്നും.
പിന്നെ കഥാകൃത്തിന്റെ അവസാനത്തെ ചിരി.
ഒരു വാരികയിലെ മനശാസ്ത്രജ്ഞനോട് ചോദിക്കാം എന്ന പംക്തിയിൽ നിരവധി കത്തുകളെഴുതി. അതിലെ ഫോണിൽ വിളിച്ച് നേരിൽ ചെന്നു കണ്ടു.
ആ ഡോക്ടരാണ് എന്റെ പേരിൽ ഒളിച്ചിരിക്കുന്ന ആ കഥാകൃത്തിനെ എനിക്ക് വെളിപ്പെടുത്തിയത്.
വായനശാലയിൽ ചെന്ന് അയാളുടെ കഥകൾ ചോദിച്ചു വാങ്ങി വായിച്ചു തീർത്തു.
അയാളുടെ ഒരു കഥയിൽ നിന്നാണ്‌ എനിക്ക് ഈ ആശയം തോന്നിയത്..
എല്ലാം തുറന്നു പറഞ്ഞ് ഒരു കത്തെഴുത്തുക. നിയമത്തിന് മുന്നിലെ ശിക്ഷ ഏറ്റു വാങ്ങുക.
പ്രിയ സുഹൃത്തേ എന്റെ പേരും വിലാസവും
ഈ കുറിപ്പിന്റെ മറുപുറത്തുണ്ട്.
അവിടെ എന്റെ കിടപ്പുമുറിയിൽ അയാളുടെ സഞ്ചിയും ആ തുകയും തെളിവായി വച്ചിട്ടുണ്ട്..
ഒരു ചോദ്യം കൂടെ ചേർക്കട്ടെ
എന്റെ പേരുള്ള ആ കഥാകൃത്തിന്റെ ഏതെങ്കിലും കഥ നിങ്ങൾ വായിച്ചിട്ടുണ്ടോ..?
(മറുപുറം)
കെ എസ് രതീഷ്, പന്ത
(ഗുൽമോഹർ 009)
