ആകാശവാണീ വാർത്തകൾ വായിക്കുന്നത്
ശ്രീ ജ്ഞാനപ്രകാശ്....!!
വായനാദിനത്തിന്റെ തിരക്കിനിടയിലാണ് ജ്ഞാനപ്രാകശത്തിന്റെ വിളിവന്നത്.
"ഹലോ എന്നെ മനസിലായോ,സുഖാണോ ? വിഷ്ണൂന്റെ കല്യാണാണ് വരുവോ ,കുറച്ച് പൈസ ഞാൻ തരാനുണ്ട് എനിക്കൊന്ന് കാണാൻ തോന്നുന്നു ഇനി ചിലപ്പോൾ..."
ഞാൻ "വായനയും പുതുതലമുറയും" എന്ന പ്രസംഗ മത്സരത്തിനിടയിലായിരുന്നു.
"ഞാൻ വരാം...ഞാൻ തിരിച്ചു വിളിക്കാട്ടോ " ഇതായിരുന്നു എന്റെ മറുപടി.
പതിവുപോലെ നിലമ്പൂർ- തിരുവനന്തപുരം തീവണ്ടി കൊല്ലത്തെത്തിയപ്പോൾ പുലർച്ചെ ഏഴായിരുന്നു ദേശാഭിമാനിയുടെ പ്രാദേശിക കോളത്തിൽ കണ്ടവാർത്ത എന്നെ തീവണ്ടിയിൽ നിന്നുവലിച്ചിറക്കി.
സ്വത്ത് തർക്കത്തിൽപ്പെട്ട് എസ് എൻ കോളേജിന്റെ ഇടതുവശത്തുള്ള മൂന്നു നില കൊട്ടിടത്തിന്റെ ഏറ്റവും അടിയിലത്തെ നിര "വോൾഗാ" ലോഡ്ജായിരുന്നു. കോടതിയുടെ ക്ഷമ നശിച്ച് മരണം കാത്തുകിടന്ന ആ കെട്ടിടം ഞങ്ങൾക്ക് ലക്ഷ്വറി അപ്പാർട്ട്മെന്റായിരുന്നു.
നഗരത്തിലെ സമ്പന്നരുടെ പബ്ലിക്ക് സ്കൂളിലെ അദ്ധ്യാപകൻ, അനാഥാലയം പിന്തള്ളിയ പൂർവ്വവിദ്യാർഥി ഇതായിരുന്നു എന്റെ വിലാസം
പി എസ് സി പഠിക്കുന്ന കുറച്ചു കുട്ടികൾ, അയമോദകം ഗുളിക വിൽക്കുന്ന പാലക്കാട്ടുകാരൻ മാണിക്ക്യൻ, തട്ടുകട നടത്തുന്ന കരീമിക്ക, കഥയെഴുത്തുകാരൻ ജയപ്രകാശ് കാറ്റാടി, പിന്നെ കോളേജിലെ നാലഞ്ചു പിള്ളേരുടെ കുടിമുറി, അതുകഴിഞ്ഞാൽ രണ്ട് കട്ടിലിടാവുന്ന, ജനലിലും ജാളികളിലും കൊതുകുവലകെട്ടിയ,മറ്റുമുറികളിൽ നിന്നും തെളിഞ്ഞ നിറമുള്ള എന്റെ മുറി...ഒടുവിലത്തെ ഇടുങ്ങിയ മുറിയിൽ ജ്ഞാനപ്രാകാശും രണ്ടുമക്കളും ആ മുറിയിലാണ് ഈ വാർത്തയുടെ വേരുകൾ.
സുഹൃത്തുക്കളുമായി മുറിയൊരുക്കുന്നതിനിടയിൽ അടുത്ത് മുറിയിൽ നിന്ന് പഴയ സ്റ്റൗകത്തിക്കുന്ന ശബ്ദം കേൾക്കാമായിരുന്നു. എനിക്കും കൂട്ടുകാർക്കും ചുടുവെള്ളവും പിന്നെ വിലകുറഞ്ഞ റം തീർക്കാൻ സോഡകഴിഞ്ഞപ്പോൾ കൂജയിലെ വെള്ളവും തന്നു പകരം അറുപത് ആ മുറിയിലേക്കും കൊടുത്തൂ.
നിരങ്ങിപ്പോകാനുള്ള വണ്ടിയും , ഒരു മുളവടിയും ജ്ഞാനപ്രാകാശം എന്നോട് ചിരിച്ചു. മുറിയിൽ ഒരു കാവി മുണ്ടും ഏതോ സ്കൂളിന്റെ ഉടുപ്പുമിട്ട് ഒരു ചെക്കൻ കിടക്കുന്നുണ്ടായിരുന്നു.
ആഴ്ച്ചയിൽ മുപ്പത്തിനാലുവരെ പിരീഡ്കളുള്ള അടിമപ്പണിചെയ്യുന്ന സ്വകാര്യസ്കൂളിലെ അദ്ധ്യാപകർക്ക് ശനി അലക്കാനും ഞായർ ഉറങ്ങാനുമാണെന്ന് ഞാൻ വിശ്വസിച്ചിരുന്നു. എന്നും രാവിലെ മുറിയുടെ വാതിലിൽ തലേദിവസത്തെ പത്രം ഉറക്കെ വായിക്കുന്നതുകേട്ടണ് ഞാനുണരാറുള്ളത്
"ആകാശവാണീ വാർത്തകൾ വായിക്കുന്നത് ശ്രീ ജ്ഞാനപ്രകാശ്....
ജൂണിൽ മഴകനക്കും.."
ഞായറാഴ്ച്ചകളിൽ വാർത്തമുഴുവൻ കേട്ടുകിടക്കും വാർത്തകഴിഞ്ഞാലും കിടക്കും പിന്നെ കുളിച്ച് തുണിയൊക്കെ മടക്കിക്കഴിയുമ്പോൾ പ്രഭാതഭക്ഷണം മറക്കാൻ കഴിയും അല്ലെങ്കിലും ഒരു ചായയ്ക്കപ്പുറം അതിന് കനമുണ്ടായിരുന്നില്ല.
വനിതാ ഹോട്ടലിപ്പോയി ഇരട്ടപ്പൊതിയൂണ് വാങ്ങിവന്നപ്പോഴാണ്, ഒരു കുപ്പി റമ്മും പിന്നെ ചിക്കനും ചപ്പാത്തിയുമായി കൂട്ടുകാരെത്തിയത് ഇടയ്ക്ക് മൂത്രപുരയിലേക്കു ഇറങ്ങിയപ്പോഴാണ് ചോറുപൊതി വാതിലിൽ തൂക്കിയിട്ടത് കണ്ടത്, അതൊടുത്ത് ചവറു വീപ്പയിലേക്ക് എറിയാൻ ജ്ഞാനേട്ടൻ സമ്മതിച്ചില്ല "കളയല്ലേ മോനേ ഞാൻ തിന്നോളാം" പിറ്റേന്നും വാർത്തകേട്ടാണുണർന്നത്
"ആകാശവാണീ വാർത്തകൾ വായിക്കുന്നത് ശ്രീ ജ്ഞാനപ്രകാശ്
ലോട്ടറികൾ നിർത്തുന്നൂ...."
പിന്നെ വാർത്തകേട്ടില്ല.
ലോഡ്ജു നോക്കിനടത്തണ സ്വാമിദാസ് ജ്ഞാനപ്രകാശിന്റെ സ്റ്റൗവും പാത്രങ്ങളും പുറത്തേക്ക് വലിച്ചെറിയുന്ന ശബ്ദം കേട്ടാണ് ഞാനിറങ്ങിയത്.
" സാറേ ആകെ മുന്നുറുരൂപയാ അതെങ്കിലും തരാൻ പറ്റില്ല ഈ ചെറ്റകൾക്ക്....കുടിക്കാനൊക്കെ ഉണ്ട് ഒരാൾടെ മുറിയിൽ ഇപ്പൊ രണ്ടാളാ ചെലപ്പോ മൂന്നും.. "
എന്റെ മുറിക്ക് അറുനൂറ് രൂപയായിരുന്നു അഞ്ചുമാസത്തെ മുന്നേ വാങ്ങിയിരുന്നു. ജ്ഞാനം എന്നോട് അറുന്നൂറ് കടം വാങ്ങിയിരുന്നു ഇപ്പൊ മുന്നൂറും. പാത്രവും സ്റ്റൗവും ഞാൻ എടുത്തുവയ്ക്കാൻ സഹായിച്ചു.
അന്ന് മഴ തകർത്തുപെയ്തു മുറിയിലാകെ ഓടയിലെ വെള്ളം കയറി, ജ്ഞാനേട്ടൻ എന്റെ മുറിയിലേക്ക് നീന്തിവന്നു അവിടെയും മുട്ടൊപ്പം വെള്ളമായിരുന്നു. അരക്കുപ്പി റമ്മും കടലയും ജ്ഞാനത്തിന്റെ കഥകൾ എനിക്കുപറഞ്ഞുതന്നു.
"സി എൽ സി കാഷ്യൂസ് എന്ന് കേട്ടിട്ടുണ്ടോ അതിലെ മാനേജരായിരുന്നു ഞാൻ ഈ ലോഡ്ജും, സാറു ജോലി ചെയ്യണ സ്കൂളും എല്ലാം സി എൽ സീടെയാ. അന്ന് ബാങ്കിൽ പൈസായിടാൻ പോകുന്ന വഴീല് എന്റെ സ്കൂട്ടറിൽ ലോറി തട്ടി ഞാൻ കിടപ്പിലായി ആശുപത്രീ കിടന്ന് ചികിത്സയ്ക്കെന്നും പറഞ്ഞ് അവൾ എല്ലാം ഒപ്പിട്ടുവാങ്ങി. രണ്ട് കുട്ടികളേം എന്നേം ആശുപത്രീൽ ഇട്ടിട്ട് അവൾ പോയി പിന്നെ എല്ലാരും ഞങ്ങളെ മറന്നു ലോട്ടറി വിറ്റ് ഇതുവരെ പിടിച്ചു നിന്നു. ഒരുത്തനെ ഞാൻ പൊള്ളാച്ചില് ഒരു ഐ റ്റി ഐ യിലാക്കി ഇവനിനി പഠിക്കണില്ലെന്നാ പറേണത് എന്താവൂന്ന് അറിഞ്ഞൂടാ.."
എനിക്ക് ജോലികിട്ടി മലബാറിലേക്ക് പോകും മുന്നേ ഒരു സുഹൃത്തുമുഖേനെ ഇളയ ചെക്കനെ ഒരു തുണിക്കടയിലാക്കി, മൂത്ത ചെക്കൻ നാട്ടിലെ ഒരു വർക്ക്ഷോപ്പിൽ ജോലിയായെന്നും കല്യാണം കഴിച്ചെന്നും, ജ്ഞാനത്തിനെ അവിടേക്ക് കൊണ്ടുപോയെന്നും സ്വാമിപറഞ്ഞൂ, അടുത്തിടെ ഇളയചെക്കൻ ഫോൺചെയ്തപ്പോൾ വിവാഹക്കാര്യവും പറഞ്ഞു.
പിന്നെ ഞാൻ ജ്ഞാനത്തെക്കുറിച്ചറിയുന്നത് ഈ വാർത്തയിലാണ്.
ലോഡ്ജിലെത്തുമ്പോൾ സ്വാമിയാണ് പറഞ്ഞത്
"മക്കൾ ഇയാളെ ഇവിടെ കൊണ്ടാക്കി നാലുമാസായി, കൃത്യമായി വാടകയും എത്തിക്കാറുണ്ട് ഇപ്പൊ അവരൊക്കെ നല്ല നെലേലാ..ഇന്നലെ മഴയായിരുന്നില്ലേ...."
അപ്പൊഴും എന്റെ ഉള്ളിലിരുന്ന് ജ്ഞാനപ്രകാശ് വാർത്തകൾ വായിക്കുകയായിരുന്നു.
"ആകാശവാണീ വാർത്തകൾ വായിക്കുന്നത്
ശ്രീ ജ്ഞാനപ്രകാശ്...
ലോഡ്ജ് മുറിയിൽ വൃദ്ധൻ മുങ്ങി മരിച്ചനിലയിൽ....."
രതീഷ് .കെ . എസ്
ജി എച്ച് എസ് എസ് എടക്കര.
