പോലീസ്ഥാനിലേക്ക് പോയ കുട്ടികൾ..!!
രാജ്യമുള്ളോൻ ഞാൻ
വെളുത്തനിറം നീണ്ടമുടി നീലക്കണ്ണുകൾ കലാകാരൻ...
നാട്ടുരാജാവിന്റെ യന്ത്രത്തോക്ക് കാണാനില്ലത്രേ...
രാത്രിയുടെ മറവിന്നവരെന്നെ കൊണ്ടുപോയി...
കക്കയത്തെ സത്യാബെഞ്ചിൽ ഒരു നാരായണന്റെ പുലികളികൾ....
ഒളിച്ചുകളിക്കുന്ന എന്നെത്തിരഞ്ഞൊരച്ഛൻ.
വിനയമുള്ളോൻ ഞാൻ
കറുത്തനിറം, നീണ്ടമുടി,നീലക്കണ്ണുകൾ..
നാട്ടുരാജാവിന്റെ കിരീടത്തിലെ ചുവന്നമുത്ത കാണാനില്ലത്രേ...
പകലിലെന്റെ പെണ്ണിൻ മുന്നീന്നവരെന്നെ കൊണ്ടുപോയി...
പാവറട്ടി, ആണ്മുലക്കണ്ണ് പീനൽക്കോഡിലെ മായക്കാഴ്ച്ചകൾ...
ഉയിരിട്ടൂഞ്ഞാലാടിയ എന്നെ അച്ഛൻ കുളിക്കാൻ വിളിക്കുന്നു...
പോലീസ്ഥാനിലേക്ക്
പോകല്ലേ കുഞ്ഞേ....
മുടിനീട്ടി വളർത്തല്ലേ കുഞ്ഞേ...
നീ
മുടിവെട്ടി തൊപ്പി തിരുകി, അരകെട്ടിയുറപ്പിച്ച്, ബൂട്ടിട്ട് ഭൂമിയുടെ നാഭിയിൽ ഉറച്ചു നിന്നിട്ട്...
തോക്കുചൂണ്ടിപ്പറയുക...
*"മൃദുഭാവേ ദൃഡകൃത്യേ"...
രാജ്യമുള്ളോനും..
വിനയമുള്ളോനും പ്രളയമാകുന്നുണ്ട് ....
*നിങ്ങൾ ഞങ്ങടെ കുരുത്തമക്കളെ ചുട്ടുതിന്നില്ലേ...
നിങ്ങളോർക്കുക..
നിങ്ങളോർക്കുക...
നിങ്ങളെങ്ങനെ നിങ്ങളായെന്ന്....!!
കെ എസ് രതീഷ്
( ഗുൽമോഹർ 009)
No comments:
Post a Comment