കവിത മണ്ണെണ്ണ വിളക്കിന്റെ ചോദ്യങ്ങൾ

മണ്ണെണ്ണ വിളക്കിന്റെ ചോദ്യങ്ങൾ..!!

മൊബൈലിന്റെ കാലത്ത് ആരെങ്കിലും
പ്രണയലേഖനമെഴുതുമോ?
സ്വീകരിക്കാനാളിത്ത ഒരു കത്ത് തികഞ്ഞഭ്രാന്തല്ലേ..?
വിശപ്പും മാനവുമല്ലാതെ
ഈ വീട്ടിൽ വിൽക്കാനെന്തുണ്ടായിരുന്നു?
ആ കീറസഞ്ചിയിൽ
മുഷിഞ്ഞ പുസ്തകത്തിനിടയിൽ
ആ പ്രണയക്കുറിപ്പെത്രകാലം
വീർപ്പുമുട്ടിയിട്ടുണ്ടാകും..?
കൂട്ടുകാരിയോട് വീമ്പിളക്കി
പ്രണയനാടകം കളിച്ചതെന്തിവൾ ?
അല്ലെങ്കിലും വിദ്യാലയമുറ്റത്തെ സമ്മേളനത്തിൽ ആ കത്ത് വായിക്കപ്പെട്ടാൽ ഇവൾക്കെന്ത് ?
എന്റെ കത്തലടക്കാൻ
കൂട്ടിവച്ചതെടുത്ത്
അവളവളെ കത്തിച്ചതെന്തിന്?
അല്ലെങ്കിലും ഈ പെണ്ണിന് മുഴുഭ്രാന്തുതന്നെ അവരൊക്കെ അദ്ധ്യാപകരല്ലേ....?
തിരിയില്ലാതെ വെളിച്ചമുള്ള ഇലക്ട്രിക്ക് ബൾബുകൾ
അവരോട്
ഒരു മണ്ണെണ്ണ വിളക്കെന്തുപറയാൻ.?.!!

(പ്രണയലേഖനം കണ്ടുപിടിച്ചതിന്റെ അപമാനം താങ്ങാതെ ആത്മഹത്യചെയ്തവൾക്ക്)

രതീഷ് കെ എസ്
ജി എച്ച് എസ് എസ്
എടക്കര.